سی پی این ای کے سابق سیکریٹری جنرل عامر محمود انتقال کر گئے

کراچی: سی پی این ای کے سابق سیکریٹری جنرل عامر محمود کراچی میں آج دوپہر انتقال کر گئے۔

 عامر محمود کا تعلق’’ کرن / خواتین ڈائجسٹ گروپ‘‘ سے تھا۔ مرحوم محمود ریاض کے صاحبزادے اور ابن انشاء کے بھتیجے تھے۔

کونسل آف پاکستان نیوز پیپر ایڈیٹرز(سی پی این ای) نے سابق سیکریٹری جنرل، سینئر صحافی،ماہانہ کرن/ خواتین/ شعاع/ عمران ڈائجسٹ گروپ کے چیف ایڈیٹر عامر محمود کے انتقال پر گہرے رنج و غم کا اظہار کیا ہے۔

مرحوم محمود ریاض کے صاحبزادے اور ابن انشاء کے بھتیجے تھے۔ عامر محمود کا انتقال آج (بدھ) کی دوپہر ان کی رہائش گاہ خیابان محافظ ڈیفنس فیز VI، کراچی میں ہوا، ان کے انتقال کی خبر پر صحافتی برادری اور میڈیا سے وابستہ حلقوںمیں گہرے دکھ اور افسوس کی لہر دوڑ گئی۔

صدر پاکستان آصف علی زرداری، وفاقی وزیر اطلاعات عطاء اللہ تارڑر،گورنر سندھ کامران ٹیسوری،وزیر اعلیٰ سندھ سید مراد علی شاہ، وزیراعلیٰ پنجاب مریم نواز، وزیر اطلاعات سندھ شرجیل انعام میمن اور میئر کراچی مرتضیٰ وہاب نے عامر محمود کے انتقال پر افسوس کا اظہار کیا ہے اور ان کی صحافتی خدمات کو خراج عقیدت پیش کیا ہے۔

 کراچی پریس کلب کا اظہار افسوس

سی پی این ای کے سابق سیکریٹری عامر محمود کے انتقال پر صدر کراچی پریس کلب فاضل جمیلی، سیکریٹری سہیل افضل خان اور مجلسِ عاملہ نے گہرے رنج و غم کا اظہار کیا ہے۔

کراچی پریس کلب سے جاری تعزیتی بیان میں پریس کلب کے عہدیداروں نے کہا کہ مرحوم صحافی اور میڈیا دوست، باصلاحیت منتظم اور صحافتی برادری کے مسائل کے حل کے لیے سرگرم رہنما تھے۔مرحوم آزادی صحافت اور انسانی حقوق کی بنیادی جدوجہد میں ہمیشہ پیش پیش رہے ان کی خدمات کو ہمیشہ یاد رکھا جائے گا ۔

کراچی پریس کلب کے عہدیداران نے دعا کی کہ اللہ تعالیٰ مرحوم کو اپنی جوارِ رحمت میں بلند مقام عطا فرمائے اور پسماندگان کو صبرِ جمیل دے۔ آمین یارب العالمین