سیلاب اور خراب موسم کے باعث فلائٹ آپریشن متاثر، 23 پروازیں منسوخ

پنجاب میں سیلابی صورتحال، مختلف شہروں میں موسمی خرابی اور انتظامی مسائل کے باعث فلائٹ آپریشن بری طرح متاثر ہوا ہے۔ ملک بھر میں 23 پروازیں منسوخ جبکہ درجنوں کی آمد و روانگی میں تاخیر ریکارڈ کی گئی ہے۔

ایوی ایشن ذرائع کے مطابق مجموعی طور پر 48 ملکی اور غیر ملکی پروازیں تاخیر کا شکار ہیں۔ سیالکوٹ ایئرپورٹ پر آج غیر ملکی ایئر لائنز کی 14 پروازیں منسوخ ہوئیں جبکہ باقی پروازیں لاہور ایئرپورٹ سے آپریٹ کی جا رہی ہیں۔ دبئی سے سیالکوٹ آنے والی ایک پرواز بھی لاہور اتاری گئی۔

اسی طرح ابوظبی سے پشاور آنے والی پرواز پی کے 218 کو موسمی خرابی کے باعث ملتان ایئرپورٹ پر اتارا گیا۔ اسلام آباد سے کراچی جانے والی پرواز پی اے 201 منسوخ کر دی گئی۔

گلگت کے لیے اسلام آباد سے چلنے والی چار پروازیں (پی کے 601، 602، 603، 604) اور اسکردو کے لیے کراچی سے نجی ایئر لائن کی دو پروازیں (پی اے 704، 705) بھی منسوخ ہوئیں۔ لاہور سے اسکردو جانے والی پروازیں (پی اے 480، 481) بھی شیڈول سے خارج کر دی گئیں۔

فلائٹ شیڈول کے مطابق اسلام آباد ایئرپورٹ پر 18 پروازیں ایک سے چھ گھنٹے تاخیر کا شکار رہیں۔ لاہور ایئرپورٹ کی 15 پروازوں میں ایک سے سات گھنٹے تک تاخیر ہوئی، جبکہ کراچی ایئرپورٹ پر دس پروازوں کو ڈیڑھ سے ساڑھے پانچ گھنٹے کی تاخیر کا سامنا رہا۔

مزید یہ کہ کراچی سے اسلام آباد جانے والی چھ پروازوں میں ایک سے چھ گھنٹے اور کراچی لاہور کے درمیان پانچ پروازوں میں ایک سے ڈھائی گھنٹے تک تاخیر ریکارڈ کی گئی۔