ڈاکٹر عافیہ صدیقی کیس کی سماعت کے لیے نیا بینچ بھی تحلیل

اسلام آباد ہائیکورٹ میں ڈاکٹر عافیہ صدیقی کی صحت اور وطن واپسی سے متعلق درخواست پر سماعت کے لیے تشکیل دیا گیا نیا بینچ بھی ٹوٹ گیا۔

تفصیلات کے مطابق جسٹس انعام امین منہاس نے ڈاکٹر فوزیہ صدیقی کی درخواست پر سماعت کی، جس میں ان کے وکیل عمران شفیق ایڈووکیٹ پیش ہوئے۔ جسٹس انعام امین نے کہا کہ یہ معاملہ سنگل بینچ کے دائرہ اختیار میں نہیں آتا اور کیس کو لارجر بینچ کے سامنے رکھا جائے گا۔

اس سے قبل جسٹس سردار اعجاز اسحاق نے وزیراعظم اور کابینہ کو عدالتی حکم عدولی پر توہینِ عدالت کے نوٹس جاری کیے تھے، بعد ازاں کیس کو ان کی عدالت سے منتقل کرکے جسٹس انعام امین کے پاس بھیجا گیا تھا۔

سماعت کے دوران وکیل عمران شفیق نے دلائل دیے کہ معاملہ مزید پیچیدہ ہوگیا ہے۔ جس پر جسٹس انعام منہاس نے ریمارکس دیے کہ کوئی پیچیدگی نہیں، میرا فیصلہ واضح ہے کہ "ماسٹر آف روسٹر” چیف جسٹس ہیں۔ تاہم، اس نکتے پر مختلف آرا سامنے آنے کی وجہ سے یہ مسئلہ لارجر بینچ کے سپرد کیا جارہا ہے تاکہ حتمی فیصلہ دیا جا سکے۔

بعدازاں عدالت نے فیصلہ کیا کہ چیف جسٹس کے "ماسٹر آف روسٹر” ہونے یا نہ ہونے کے معاملے پر لارجر بینچ تشکیل دیا جائے گا۔