بھارت نے ستلج میں مزید پانی چھوڑدیا،سیلابی الرٹ جاری

بھارت نے ستلج میں مزید پانی چھوڑدیا،سیلابی الرٹ جاری

بھارت کی جانب سے دریائے ستلج میں اضافی پانی چھوڑے جانے کے بعد پنجاب کے مختلف اضلاع میں ہائی الرٹ جاری کر دیا گیا ہے۔ بھارتی ہائی کمیشن نے اس بارے میں پاکستان کو باضابطہ آگاہ کر دیا ہے۔

پانی کے اچانک اضافے سے دریائے ستلج میں ہریک اور فیروز پور کے مقامات پر اونچے درجے کے سیلاب کا خدشہ ظاہر کیا گیا ہے۔

فلڈ فورکاسٹنگ ڈویژن کے مطابق دریائے چناب تریموں کے مقام پر انتہائی بلند درجے جبکہ قادرآباد اور چنیوٹ پر نچلے درجے کے سیلاب کی لپیٹ میں ہے۔ دریائے راوی میں بلوکی اور سدھنائی کے مقامات پر بھی بہت اونچے درجے کے سیلاب کی نشاندہی کی گئی ہے۔

مزید براں، جسڑ اور شاہدرہ کے مقامات پر سیلابی دباؤ کے ساتھ ساتھ دریائے سندھ میں گڈو، سکھر اور کوٹری بیراج پر نچلے درجے کے سیلاب کی صورتحال برقرار ہے، جہاں گڈو بیراج سے اس وقت 3 لاکھ 45 ہزار کیوسک پانی خارج ہو رہا ہے۔

واضح رہے کہ موجودہ سیلابی صورتحال کے باعث پنجاب میں اب تک تقریباً 24 لاکھ افراد متاثر ہو چکے ہیں، جن میں سے 9 لاکھ افراد بے گھر جبکہ 41 افراد اپنی جان سے ہاتھ دھو بیٹھے ہیں۔