بحرین ڈیفنس فورس کے چیف کا نیول ہیڈکوارٹرز کا دورہ، پاک بحریہ کے سربراہ سے ملاقات

 راولپنڈی:بحرین ڈیفنس فورس کے چیف لیفٹیننٹ جنرل ذیاب بن صقر  آج نیول ہیڈ کوارٹرز پہنچے اور پاک بحریہ کے سربراہ ایڈمرل نوید اشرف سے ملاقات کی۔ 

مسلح افواج کے شعبہ تعلقات عامہ آئی ایس پی آر کے مطابق ملاقات میں خطے کی سیکیورٹی صورتحال اور دو طرفہ تعاون پر تبادلۂ خیال کیا گیا۔

نیول چیف نے ریجنل میری ٹائم سیکیورٹی پٹرولز کے ذریعے خطے میں امن کے اقدامات سے انھیں آگاہ کیا۔  

آئی ایس پی آر کے مطابق بحرین ڈیفنس فورس کے سربراہ نے خطے میں سیکیورٹی سے متعلق پاک بحریہ کی کاوشوں کو سراہا۔ ملاقات میں پاکستان اور بحرین کے درمیان دفاعی تعلقات کو مزید مضبوط بنانے کے عزم کا اعادہ بھی کیا گیا۔ 

آئی ایس پی آر کے مطابق دورے سے دونوں ممالک بالخصوص افواج کے درمیان تعلقات کو مزید فروغ ملے گا۔