اعجاز چودھری کی نااہلی کیخلاف درخواست پر فیصلہ محفوظ

لاہور: پاکستان تحریک انصاف کے رہنما اور سینیٹر اعجاز چودھری کی نااہلی کے خلاف دائر درخواست کی سماعت مکمل ہونے کے بعد عدالت نے فیصلہ محفوظ کر لیا ہے۔

جسٹس احمد ندیم ارشد نے کیس کی سماعت کی۔ دورانِ سماعت وفاقی حکومت اور الیکشن کمیشن کے وکلاء نے مؤقف اختیار کیا کہ اعجاز چودھری کو 9 مئی کے واقعات میں انسدادِ دہشت گردی عدالت کی جانب سے 10 سال قید کی سزا سنائی جا چکی ہے، جس کے نتیجے میں الیکشن کمیشن نے نااہلی کا نوٹیفکیشن جاری کیا۔

دوسری جانب اعجاز چودھری کے وکیل نے مؤقف اپنایا کہ سزا کے بعد کسی رکنِ سینیٹ کو نااہل قرار دینے سے قبل ان کا مؤقف سننا ضروری تھا، لیکن ایسا نہیں کیا گیا۔

عدالت نے فریقین کے دلائل مکمل ہونے کے بعد درخواست قابلِ سماعت ہونے یا نہ ہونے سے متعلق فیصلہ محفوظ کر لیا۔