بشریٰ بی بی اور عمر ایوب سمیت پی ٹی آئی رہنماؤں کی ضمانت میں 13 نومبر تک توسیع

اسلام آباد: انسداد دہشت گردی عدالت نے 26 نومبر احتجاج کیس میں بانی پی ٹی آئی کی اہلیہ بشریٰ بی بی، عمر ایوب اور دیگر رہنماؤں کی ضمانت قبل از گرفتاری میں 13 نومبر تک توسیع کر دی۔

اے ٹی سی اسلام آباد کے جج ابوالحسنات محمد ذوالقرنین نے کیس کی سماعت کی، جس میں شیر افضل مروت، سابق وزیراعظم آزاد کشمیر عبدالقیوم نیازی سمیت دیگر رہنما عدالت میں پیش ہوئے۔

عدالت نے پی ٹی آئی رہنماؤں کے خلاف سپریم کورٹ کے باہر احتجاج اور دیگر مقدمات میں پولیس کو ملزمان کی گرفتاری سے روک دیا۔ سماعت کے دوران عمر ایوب، زرتاج گل اور دیگر کی حاضری سے استثنا کی درخواستیں بھی منظور کر لی گئیں۔

واضح رہے کہ پی ٹی آئی رہنماؤں کے خلاف مجموعی طور پر 240 سے زائد ضمانتیں زیرِ سماعت ہیں۔ عدالت نے آئندہ سماعت پر فریقین کو اپنے دلائل پیش کرنے کی ہدایت کی ہے۔ ملزمان کے خلاف تھانہ رمنا، سنگجانی، ترنول اور دیگر تھانوں میں مقدمات درج ہیں۔

---