کراچی میں بارش جاری، سڑکیں تالاب بن گئیں

کراچی: شہر قائد کے مختلف علاقوں میں وقفے وقفے سے بارش کا سلسلہ جاری ہے، سڑکوں پر پانی جمع ہو گیا، ٹریفک کی روانی میں مشکلات کا سامنا ہے، کئی علاقوں میں بجلی کی فراہمی معطل ہے۔

گزشتہ روز سے کراچی میں وقفے وقفے سے ہلکی اور تیز بارش کا سلسلہ جاری ہے، جس سے نشیبی علاقوں میں پانی جمع ہونے کی شکایات موصول ہوئیں۔

نجی ٹی وی کے مطابق  تیسر ٹاؤن، صدر، اولڈسٹی ایریا، آئی آئی چندریگر روڈ پر بارش کا سلسلہ جاری ہے،اورنگی ٹاؤن، کلفٹن، گارڈن، سرجانی اور ملحقہ علاقوں میں بھی بادل برس پڑے،لانڈھی، فوارہ چوک، سہراب گوٹھ اور اطراف میں بارش جاری ہے۔

 دوپہر ایک بجے کے بعد ایم اے جناح روڈ، صدر، لائٹ ہاؤس سمیت مختلف علاقوں میں بارش کا سلسلہ ایک بار پھر شروع ہوگیا ہے۔ بعد ازاں گلستان جوہر، گلشن حدید، شاہراہ فیصل، کورنگی، بہادر آباد، گلشن اقبال اور دیگر علاقوں میں بھی بارش کا  جاری ہے۔

محکمہ موسمیات اور ضلعی انتظامیہ نے شہریوں سے اپیل کی ہے کہ وہ غیر ضروری سفر سے گریز کریں، بجلی کے کھمبوں، ننگی تاروں اور گہرے پانی والے مقامات سے دور رہیں۔ شہری کسی بھی ہنگامی صورتحال میں ریسکیو اداروں سے فوری رابطہ کریں۔

ماہرین موسمیات کے مطابق آج شہر میں بارش کے 4 سے 6 اسپیل متوقع ہیں، جن میں بعض مقامات پر 100 ملی میٹر سے زائد بارش ہو سکتی ہے۔

محکمہ موسمیات کا کہنا ہے کہ یہ غیر معمولی موسم کا نظام ہے جو بھارت کی جانب سے سندھ میں ڈیپریشن یا ڈیپ ڈیپریشن کی صورت میں داخل ہو رہا ہے اور اس کا راستہ بھی غیر واضح اور پیچیدہ ہے جس کی وجہ سے بارش کی شدت مختلف علاقوں میں متغیر رہ سکتی ہے۔

شدید بارشوں کے پیش نظر شہر میں اربن فلڈنگ کا خدشہ ظاہر کیا گیا ہے، جبکہ ملیر ندی میں بھی گزشتہ روز سیلابی صورتحال پیدا ہو گئی، جو طویل عرصے سے خشک رہی تھی۔

موسمی صورتحال کے باعث جناح سندھ میڈیکل یونیورسٹی نے آج ہونے والے تمام امتحانات ملتوی کر دیے ہیں۔ یونیورسٹی انتظامیہ نے ورک فرام ہوم پالیسی نافذ کرتے ہوئے اعلان کیا ہے کہ تمام کلاسز آن لائن لی جائیں گی۔ وائس چانسلر کے مطابق، طلباء اور اسٹاف کی جان و مال کے تحفظ کو مدنظر رکھتے ہوئے یہ فیصلہ کیا گیا ہے۔