وزیراعظم شہباز شریف اظہاریکجہتی کیلئے قطر روانہ

اسلام آباد: وزیراعظم محمد شہباز شریف ایک روزہ دورے پر وفد کے ہمراہ قطر روانہ ہوگئے۔

ترجمان دفتر خارجہ کے مطابق وزیراعظم یہ دورہ قطر پر اسرائیلی جارحیت کے تناظر میں کر رہے ہیں، تاکہ امیرِ قطر شیخ تمیم بن حماد الثانی، قطری شاہی خاندان اور عوام کے ساتھ اظہارِ یکجہتی کیا جا سکے۔

وزیراعظم کے ہمراہ نائب وزیراعظم و وزیر خارجہ اسحاق ڈار، وزیر دفاع خواجہ محمد آصف، وزیر اطلاعات عطاء اللہ تارڑ اور معاونِ خصوصی طارق فاطمی بھی وفد میں شامل ہیں۔

ترجمان کے مطابق وزیراعظم شہباز شریف دوحہ میں امیرِ قطر سے ملاقات کریں گے۔ ملاقات میں اسرائیل کے بلاجواز حملوں، خطے میں بڑھتی جارحیت اور امن کے قیام کیلئے اقدامات پر تبادلہ خیال ہوگا۔

پاکستان اور قطر کے درمیان برادرانہ تعلقات طویل عرصے سے موجود ہیں جو مشترکہ عقائد اور اقدار کی بنیاد پر استوار ہیں۔