وزیراعظم شہباز شریف یکجہتی کے اظہار کے لیے قطر پہنچ گئے

اسلام آباد: وزیراعظم محمد شہباز شریف ایک روزہ دورے پر وفد کے ہمراہ قطر پہنچ گئے۔ دوحہ ایئرپورٹ پر ان کا استقبال قطر کے نائب وزیراعظم اور وزیرِ مملکت برائے دفاع شیخ سعود بن عبد الرحمن بن حسن الثانی نے کیا۔

 

وزیراعظم کے وفد میں نائب وزیراعظم و وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات عطاء اللہ تارڑ اور معاون خصوصی طارق فاطمی بھی شامل ہیں۔

ترجمان دفتر خارجہ کے مطابق وزیراعظم کا یہ دورہ قطر پر اسرائیلی جارحیت کے تناظر میں ہے۔ وہ امیر قطر شیخ تمیم بن حماد الثانی، شاہی خاندان اور قطری عوام کے ساتھ اظہار یکجہتی کریں گے۔

 

دوحہ میں ہونے والی ملاقات میں اسرائیل کے بلاجواز حملوں، خطے کی صورتحال اور امن کے قیام کے لیے مشترکہ اقدامات پر تبادلہ خیال ہوگا۔

 

یاد رہے کہ پاکستان اور قطر کے تعلقات تاریخی اور برادرانہ بنیادوں پر قائم ہیں جو باہمی اعتماد اور مشترکہ اقدار پر استوار ہیں۔