ریاست ہرسال سیلابی نقصانات برداشت نہیں کرسکتی،فیلڈ مارشل سید عاصم منیر

اسلام آباد: پاک فوج کے شعبۂ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے کہا ہے کہ ریاست بار بار آنے والے سیلاب سے ہونے والے قیمتی جانوں اور املاک کے نقصان کی متحمل نہیں ہوسکتی۔

آرمی چیف نے قصور سیکٹر اور جلالپور پیر والا، ملتان میں قائم فلڈ ریلیف کیمپوں کا دورہ کیا جہاں لاہور اور ملتان کور کے کور کمانڈرز نے ان کا استقبال کیا۔ اس موقع پر انہوں نے لاہور-قصور اور ملتان-جلالپور پیر والا کے متاثرہ علاقوں کا فضائی جائزہ بھی لیا۔

آرمی چیف کو بریفنگ میں سیلابی صورتحال، جاری ریسکیو سرگرمیوں اور متاثرین کو دی جانے والی امداد سے آگاہ کیا گیا۔ انہوں نے سول انتظامیہ سے گفتگو میں اچھی حکمرانی، عوام دوست ترقی اور سول و فوجی اداروں کے قریبی تعاون کی اہمیت پر زور دیا۔

 

فیلڈ مارشل عاصم منیر نے ہدایت دی کہ متاثرہ علاقوں کو مستقبل میں سیلاب کی تباہ کاریوں سے محفوظ بنانے کے لیے تمام ضروری اقدامات اور بنیادی ڈھانچے کی تعمیر و ترقی کو تیز کیا جائے۔

 

اس دوران آرمی چیف نے ریسکیو آپریشنز میں مصروف پاک فوج کے جوانوں، ریسکیو 1122 کے اہلکاروں اور پولیس افسروں سے ملاقات کی اور ان کے عزم، پیشہ ورانہ تیاری اور عوامی خدمت کے جذبے کو سراہا۔

بعد ازاں انہوں نے محفوظ مقامات پر منتقل کیے گئے سیلاب متاثرین سے بھی ملاقات کی اور انہیں بحالی و آباد کاری کے عمل میں مکمل تعاون کی یقین دہانی کرائی۔ متاثرین نے بروقت مدد پر پاک فوج کا شکریہ ادا کیا۔