صدر آصف زرداری کی چین میں اہم ملاقاتیں، دوطرفہ تعاون پر گفتگو

صدر آصف علی زرداری نے چین کے صوبہ سچوان کے دورے کے دوران پولیٹیکل بیورو کے رکن اور وزیرِ پبلسٹی ڈیپارٹمنٹ لی شو لی سے ملاقات کی۔ ملاقات میں سیاسی، اقتصادی اور ثقافتی شعبوں میں تعاون کو مزید بڑھانے پر تبادلہ خیال کیا گیا۔

صدر زرداری نے سچوان میں شاندار مہمان نوازی پر شکریہ ادا کیا اور دوسرے گولڈن پانڈا فورم کے کامیاب انعقاد پر مبارکباد پیش کی۔

اس موقع پر لی شو لی نے صدر زرداری کو چین آمد پر خوش آمدید کہا اور صدر شی جن پنگ کی جانب سے نیک خواہشات بھی پہنچائیں۔ انہوں نے صدر زرداری کے فروری میں کیے گئے دورۂ چین اور حال ہی میں چائنا ڈے لی میں شائع ہونے والے مضمون کو بھی سراہا۔

لی شو لی نے کہا کہ صدر زرداری اور صدر شی جن پنگ نے پاک–چین تعلقات کو نئی سمت دی ہے، دونوں ممالک ہمیشہ بھائیوں کی طرح قریب رہیں گے اور آنے والے برسوں میں یہ تعلق مزید مضبوط ہوگا۔ ان کا کہنا تھا کہ آج دنیا کو بارود کی بو نہیں بلکہ کتابوں کی خوشبو کی ضرورت ہے۔