موسمیاتی اور زرعی ایمرجنسی کے تحت تمام ضروری اقدامات کریں گے: وزیر خزانہ

کمالیہ: وزیر خزانہ محمد اورنگزیب کا کہنا ہے کہ ملک میں موسمیاتی اور زرعی ایمرجنسی نافذ کر دی گئی ہے اور اس کے تحت تمام ضروری اقدامات کیے جائیں گے۔

میڈیا سے گفتگو کرتے ہوئے انہوں نے کہا کہ کسانوں کے نقصانات کا درست تخمینہ لگانے کے لیے کمیٹی تشکیل دی گئی ہے۔ ان کے مطابق حکومت زمینی حقائق پر مبنی فیصلے کر رہی ہے اور اس وقت سب سے اہم ترجیح متاثرہ عوام کی فوری امداد ہے۔

وزیر خزانہ نے بتایا کہ سیلاب سے ہونے والے نقصانات کا جائزہ لینے کے لیے سروے جاری ہیں جبکہ وزیراعظم اور آرمی چیف بھی متاثرہ علاقوں کا دورہ کر رہے ہیں۔

انہوں نے مزید کہا کہ ملکی معیشت بہتری کی طرف گامزن ہے۔ عالمی منڈی میں فیول کی قیمتوں میں کمی کے باعث مہنگائی کا دباؤ کم ہوا ہے اور حکومت اقدامات کر رہی ہے تاکہ مصنوعی مہنگائی پیدا نہ ہو۔