وزیراعظم عرب اسلامی سربراہی اجلاس میں شرکت کیلئے آج دوحہ روانہ ہوں گے

 

اسلام آباد: وزیراعظم شہباز شریف آج دوحہ روانہ ہوں گے، جہاں وہ عرب اسلامی سربراہی اجلاس میں پاکستان کی نمائندگی کریں گے۔

ترجمان دفتر خارجہ کے مطابق یہ اجلاس فلسطین کی صورتحال اور اسرائیلی فضائی حملوں کے پس منظر میں بلایا گیا ہے، جس کا انعقاد پاکستان کے تعاون سے کیا جا رہا ہے۔ اجلاس میں او آئی سی رکن ممالک کے سربراہان شریک ہوں گے۔

وزیر خارجہ اسحاق ڈار ایک روز قبل وزرائے خارجہ اجلاس میں شریک ہوئے، جہاں پاکستان نے قطر سمیت دیگر ممالک کے ساتھ مل کر اسرائیلی جارحیت کی شدید مذمت کی۔

دفتر خارجہ کے مطابق وزیراعظم شہباز شریف اس سے قبل 11 ستمبر کو دوحہ کا دورہ بھی کر چکے ہیں، جہاں انہوں نے قطری قیادت سے ملاقات میں مکمل یکجہتی کا اظہار کیا۔ پاکستان قطر کی خودمختاری اور سلامتی کے تحفظ کے لیے پرعزم ہے اور مشرق وسطیٰ میں امن و استحکام کے لیے اپنی کوششیں جاری رکھے گا۔