گڈو بیراج پر سیلابی دباؤ برقرار، گمبٹ کے کچے کے علاقے زیرِ آب

دریائے سندھ میں پانی کی سطح میں مسلسل اضافہ ہو رہا ہے جس کے باعث گڈو بیراج پر پانی کی آمد چھ لاکھ اور سکھر بیراج پر پانچ لاکھ کیوسک سے تجاوز کر گئی ہے۔

پنجاب سے آنے والا بڑا ریلا گڈو بیراج سے گزر رہا ہے جس کے نتیجے میں گمبٹ کے کچے کے سینکڑوں دیہات زیرِ آب آگئے ہیں۔ متاثرہ خاندان اپنی مدد آپ کے تحت محفوظ مقامات کی طرف منتقل ہو رہے ہیں جبکہ مقامی انتظامیہ منظر سے غائب ہے۔

ادھر سندھ کے ضلع سجاول میں سیلاب متاثرین کی امداد کے لیے پاک بحریہ کا ریسکیو اور ریلیف آپریشن جاری ہے۔ متاثرین کو خوراک، عارضی رہائش اور طبی سہولیات فراہم کی جا رہی ہیں۔

پاک بحریہ کے جوانوں نے سورجانی بند پر راشن، ٹینٹ اور روزمرہ استعمال کا سامان تقسیم کیا، جبکہ میڈیکل کیمپوں میں ماہر ڈاکٹرز مریضوں کو مفت ادویات اور علاج فراہم کر رہے ہیں۔

شاہ بندر، کوکہ بند، منارکی اور کوٹ عالم سمیت کئی متاثرہ علاقوں میں امدادی کیمپس قائم کیے گئے ہیں۔ دور افتادہ مقامات جہاں زمینی راستے بند ہیں، وہاں ہیلی کاپٹرز کے ذریعے خوراک اور امدادی سامان پہنچایا جا رہا ہے۔