جمہوریت عوام کی طاقت اور وقار کی ضامن ہے: بلاول بھٹو زرداری

اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ جمہوریت صرف نظامِ حکومت نہیں بلکہ عوام اور ان کے نمائندوں کے درمیان ایک ایسا معاہدہ ہے جو انصاف، مساوات، آزادی اور انسانی وقار کی ضمانت دیتا ہے۔

جمہوریت کے عالمی دن کے موقع پر اپنے پیغام میں ان کا کہنا تھا کہ جمہوریت ہماری قومی شناخت کی اصل روح اور ترقی کی بنیاد ہے۔ یہ شہریوں کو سیاسی عمل میں شریک کرتی ہے، سیاسی تنوع کو پروان چڑھاتی ہے اور سب کو برابر حقوق فراہم کرتی ہے۔

بلاول بھٹو نے کہا کہ پاکستان کا جمہوری سفر عظیم قربانیوں سے بھرا ہوا ہے، جن میں شہید ذوالفقار علی بھٹو اور شہید محترمہ بینظیر بھٹو سرفہرست ہیں، جنہوں نے عوام کے حقِ حکمرانی کے لیے اپنی جانیں نچھاور کیں۔

انہوں نے کہا کہ صدر آصف علی زرداری کی قیادت میں پیپلز پارٹی کی حکومت نے اٹھارویں آئینی ترمیم منظور کر کے پارلیمان کو مضبوط بنایا، جو جمہوریت کی ایک تاریخی کامیابی ہے۔

پی پی چیئرمین نے زور دیا کہ جمہوریت کا دفاع ایک مقدس ذمہ داری ہے اور اس پر کوئی سمجھوتہ مستقبل پر سمجھوتہ کے مترادف ہے۔ انہوں نے نوجوانوں پر زور دیا کہ وہ جمہوری اقدار کے تحفظ اور ایک جامع، منصفانہ اور خوشحال پاکستان کی تعمیر میں اپنا کردار ادا کریں۔

ان کا کہنا تھا کہ پیپلز پارٹی جمہوریت کے استحکام کے لیے پرعزم ہے اور اپنے قائدین و عوام کی امنگوں کے مطابق جدوجہد جاری رکھے گی۔ بلاول بھٹو نے کہا کہ ہمارے جمہوری ہیروز کی قربانیاں کبھی فراموش نہیں کی جا سکتیں، کیونکہ پاکستان کی اصل طاقت عوام کی قوت میں ہے۔