دوحہ،وزیراعظم شہباز شریف کی امیر قطر شیخ تمیم بن حماد سے ملاقات

دوحہ: وزیراعظم شہباز شریف نے امیر قطر شیخ تمیم بن حماد سے ملاقات کی، جس میں خطے کی موجودہ صورتحال کے پیش نظر دونوں رہنماؤں نے قریبی روابط برقرار رکھنے پر اتفاق کیا۔

وزیراعظم نے دوحہ میں رہائشی علاقے پر اسرائیلی حملے کی شدید مذمت کرتے ہوئے جانی نقصان پر افسوس کا اظہار کیا اور کہا کہ اسرائیلی جارحیت قطر کی خودمختاری اور عالمی قوانین کی خلاف ورزی ہے۔ انہوں نے یقین دلایا کہ پاکستان ہر مشکل وقت میں قطر کے ساتھ کھڑا ہے۔

وزیراعظم نے پاکستان اور قطر کے تاریخی تعلقات کو مزید مضبوط بنانے کے عزم کا اعادہ کرتے ہوئے کہا کہ مشرق وسطیٰ میں اسرائیلی جارحیت فوری طور پر بند ہونی چاہیے اور اس تناظر میں امت مسلمہ کے اتحاد کی ضرورت ہے۔ انہوں نے عرب اسلامی ہنگامی سربراہی اجلاس کی میزبانی پر قطر کو سراہا اور سلامتی کونسل کا ہنگامی اجلاس بلانے کی قطر کی درخواست کی حمایت کی۔

امیر قطر نے کانفرنس میں شرکت اور اظہارِ یکجہتی پر وزیراعظم شہباز شریف کا شکریہ ادا کیا۔ ملاقات میں پاکستان کی جانب سے وزیر دفاع خواجہ آصف، نائب وزیراعظم و وزیر خارجہ اسحاق ڈار، وزیر اطلاعات عطا تارڑ اور مشیر طارق فاطمی شریک تھے۔

علاوہ ازیں وزیراعظم شہباز شریف نے ترکیہ کے صدر رجب طیب اردوان، مصر کے صدر عبدالفتاح السیسی، اردن کے شاہ عبداللہ دوم اور سعودی ولی عہد محمد بن سلمان سے بھی ملاقاتیں کیں، جن میں اسرائیلی حملوں، فلسطین کی صورتحال اور دوطرفہ تعلقات پر تبادلہ خیال کیا گیا۔