اقتصادی سرگرمیوں کے روڈ میپ میں نجی شعبے کا کلیدی کردار ہوگا،وزیراعظم

لندن: وزیراعظم کی زیر صدارت زوم کے ذریعے پاکستان میں سرمایہ کاری اور اقتصادی سرگرمیوں کے فروغ سے متعلق اعلیٰ سطحی اجلاس منعقد ہوا۔

اجلاس میں گفتگو کرتے ہوئے وزیراعظم نے کہا کہ زراعت، آئی ٹی، معدنیات اور دیگر اہم شعبوں میں بیرونی سرمایہ کاری کے وسیع مواقع موجود ہیں۔ سرمایہ کاری کے ساتھ ساتھ تجارت کو فروغ دینا حکومت کی پالیسی کا حصہ ہے تاکہ برآمدات میں نمایاں اضافہ کیا جا سکے۔

وزیراعظم نے کہا کہ وزارتوں کو اہداف دیے گئے ہیں اور ہدایت کی ہے کہ جاری منصوبوں کو بروقت مکمل کرنے کے لیے تمام وسائل بروئے کار لائے جائیں۔ قابل عمل منصوبوں کی فوری نشاندہی کر کے ان پر عملی اقدامات کیے جائیں، جبکہ مستقبل کو مدنظر رکھتے ہوئے ایک جامع روڈ میپ اور اصلاحاتی ایجنڈا تشکیل دیا جائے۔

انہوں نے کہا کہ اقتصادی سرگرمیوں کے روڈ میپ میں نجی شعبے کا کلیدی کردار ہوگا اور ان کی شمولیت کو یقینی بنایا جائے گا۔ جاری معاشی اصلاحات نے معیشت کو نئی سمت دی ہے اور شفافیت و جدت کی بدولت ملک ترقی کی راہ پر گامزن ہے۔

اجلاس میں وفاقی وزیر ماحولیات مصدق ملک، وفاقی وزیر پیٹرولیم علی پرویز ملک، وفاقی وزیر خزانہ محمد اورنگزیب، وفاقی وزیر تجارت جام کمال، وزیر اطلاعات عطا اللہ تارڑ اور وزیر اقتصادی امور احد خان چیمہ شریک ہوئے۔