آئی ٹی سی این ایشیا 2025 کا کراچی میں آغاز

کراچی: پاکستان کے سب سے بڑے ٹیکنالوجی ایونٹ آئی ٹی سی این ایشیا 2025 کی تین روزہ نمائش کا آغاز کراچی ایکسپو سینٹر میں ہوگیا۔ یہ ایونٹ وزارت آئی ٹی و ٹیلی کام کے ٹیک ڈیسٹی نیشن پاکستان اقدام کے تحت منعقد ہو رہا ہے، جس میں متعدد ممالک کے سرمایہ کار اور وفود شریک ہیں۔

نمائش میں برطانیہ، ترکیہ، آذربائیجان، سعودی عرب، چین اور امریکا سمیت مختلف ممالک کے نمائندے شریک ہیں۔ توقع ہے کہ اس موقع پر ٹیکنالوجی سیکٹر میں اہم معاہدے ہوں گے جو پاکستان میں سرمایہ کاری اور آئی ٹی صنعت کے فروغ میں مددگار ثابت ہوں گے۔

ایس آئی ایف سی کی کوششوں سے آئی ٹی سیکٹر میں جدت اور تکنیکی استعداد بڑھانے کے اقدامات سامنے آ رہے ہیں، جبکہ ڈیجیٹل پاکستان وژن کے تحت نوجوانوں کے لیے روزگار کے مواقع بھی بڑھائے جا رہے ہیں۔

یہ ایونٹ پاکستان کو عالمی سطح پر جدید آئی ٹی اور ٹیلی کام ہب کے طور پر متعارف کرانے کا سنگِ میل ثابت ہوگا اور ڈیجیٹل معیشت کے استحکام میں معاونت فراہم کرے گا۔