پاکستان، چین، ایران اور روس کا افغانستان کی حمایت کا اعادہ

نیویارک ،پاکستان، چین، ایران اور روس نے وزرائے خارجہ کے چوتھے چار فریقی اجلاس میں افغانستان کو ایک آزاد، متحد اور پُرامن ریاست بنانے کی حمایت کا اعادہ کیا ہے۔ یہ اجلاس اقوام متحدہ کی جنرل اسمبلی کے موقع پر روس کی دعوت پر منعقد ہوا۔

مشترکہ اعلامیے کے مطابق فریقین نے اس بات پر زور دیا کہ افغانستان کو دہشت گردی، جنگ اور منشیات سے پاک ملک بنانے کے لیے مؤثر اقدامات ضروری ہیں۔ اجلاس میں افغان حکام پر زور دیا گیا کہ وہ اپنی سرزمین پر دہشت گردوں کے بنیادی ڈھانچے کا مکمل خاتمہ کریں۔

فریقین نے افغانستان کی معاشی صورتحال کو بہتر بنانے کے لیے علاقائی تعاون بڑھانے پر اتفاق کیا۔ اس کے ساتھ ساتھ افغان عوام کو انسانی بنیادوں پر ہنگامی امداد فراہم کرنے اور اقتصادی و تجارتی روابط کو وسعت دینے کی اہمیت کو بھی اجاگر کیا گیا۔

اعلامیے میں کہا گیا کہ افغان پناہ گزینوں کی باعزت واپسی کے لیے سہولت فراہم کی جائے اور افغانستان میں خواتین اور بچیوں کو تعلیم، روزگار اور معاشی مواقع تک رسائی دی جائے۔

چینی وزارتِ خارجہ کے مطابق افغانستان کی صورتحال پر گہری تشویش کا اظہار کرتے ہوئے اجلاس نے مشترکہ اعلامیہ جاری کیا جس کا مقصد افغان ریاست کے استحکام کے ساتھ ساتھ عالمی امن کو بھی فروغ دینا ہے۔