پاک-افغان انگور اڈہ بارڈر 2 سال بعد دوبارہ کھول دیا گیا

جنوبی وزیرستان کی تحصیل برمل میں 2 سال سے بند انگور اڈہ بارڈر کاروباری اور تجارتی سرگرمیوں کے لیے دوبارہ کھول دیا گیا ہے۔ ضلعی انتظامیہ کے مطابق یکم اکتوبر سے پاکستان اور افغانستان دونوں جانب سے تجارتی گاڑیوں کی آمد و رفت شروع ہو جائے گی۔

بارڈر کے افتتاح کے موقع پر ڈپٹی کمشنر، رکن قومی اسمبلی، سول و عسکری حکام، قبائلی عمائدین، علماء کرام اور اسکولوں کے بچوں نے شرکت کی۔

تاجر برادری کا کہنا ہے کہ بارڈر کے دوبارہ کھلنے سے معیشت بہتر ہوگی اور لوگوں کے لیے روزگار کے نئے مواقع پیدا ہوں گے۔ انگور اڈہ کی بندش کے دوران تاجروں کو اربوں روپے کا نقصان ہوا، اور اب اس سے معاشی بدحالی کو کم کرنے میں مدد ملے گی۔