وزیراعظم شہباز شریف آزاد کشمیر کی صورتحال پر گہری تشویش کا اظہار

اسلام آباد: وزیراعظم شہباز شریف نے آزاد کشمیر میں بڑھتی ہوئی کشیدگی پر گہری تشویش اور سخت نوٹس لیتے ہوئے شہریوں سے پُر امن رہنے کی اپیل کی ہے۔ انہوں نے کہا کہ پرامن احتجاج ہر شہری کا آئینی و جمہوری حق ہے، تاہم مظاہرین کو چاہیے کہ وہ امن عامہ کو نقصان پہنچانے سے گریز کریں۔

وزیر اعظم نے قانون نافذ کرنے والے اداروں کو ہدایت کی کہ مظاہرین کے ساتھ تحمل اور بردباری کا مظاہرہ کیا جائے اور عوامی جذبات کا احترام یقینی بنایا جائے۔ انہوں نے ناخوشگوار واقعات کی شفاف تحقیقات کا حکم بھی دیا اور مظاہروں سے متاثرہ خاندانوں تک فوری امدادپہنچانے کی ہدایت کی۔

حکومت کی جانب سے مسئلے کے پرامن حل کے لیے مذاکراتی کمیٹی کو بھی وسیع کرنے کا فیصلہ کیا گیا ہے۔ کمیٹی میں سینیٹر **رانا ثنا اللہ، وفاقی وزراء سردار یوسف، احسن اقبال، سابق صدر آزاد جموں و کشمیر مسعود خان اور قمر زمان کائرہ** شامل ہیں۔

وزیر اعظم نے کمیٹی کو فوری مظفرآباد روانہ کرنے اور مسائل کا فوری اور دیرپا حل نکالنے کی ہدایت کی۔ انہوں نے ایکشن کمیٹی اور دیگر قیادت سے اپیل کی کہ وہ **مذاکراتی کمیٹی سے تعاون کریں**۔ کمیٹی اپنی سفارشات وزیراعظم آفس کو بلا تاخیر پیش کرے گی تاکہ مسائل کے فوری تدارک کے اقدامات کیے جا سکیں۔

شہباز شریف نے وطن واپسی پر مذاکراتی عمل کی نگرانی کا بھی اعلان کیا۔