ملک بھر میں نیشنل پریس کلب پر پولیس دھاوے کے خلاف احتجاج

 

نیشنل پریس کلب پر پولیس کے دھاوے کے خلاف ملک کے مختلف شہروں میں مظاہرے کیے گئے۔ اسلام آباد، لاہور، کراچی، کوئٹہ، بہاولپور، گوجرانوالا، سرگودھا، گجرات، رحیم یارخان اور دادو میں صحافیوں نے بازؤں پر سیاہ پٹیاں باندھ کر احتجاج کیا۔

اسلام آباد میں جے یو آئی (ف) کے سربراہ مولانا فضل الرحمان نے صحافیوں سے یکجہتی کا اظہار کرتے ہوئے کہا کہ پولیس نے آئین کے تقدس کو پامال کیا ہے اور پولیس گردی کی مذمت کی۔

لاہور میں احتجاج کے دوران پی ایف یو جے کے سیکرٹری جنرل ارشد انصاری نے حکومت کو خبردار کیا کہ اگر روش نہ بدلی تو ملک گیر تحریک شروع کی جائے گی۔ اس موقع پر سی پی این ای کے صدر کاظم خان اور ایمینڈ کے سینئر نائب صدر ایاز خان بھی موجود تھے۔

کوئٹہ اور کراچی میں بھی احتجاجی مظاہرے ہوئے، جہاں صحافی رہنماؤں نے پولیس اہل کاروں کے خلاف فوری کارروائی کا مطالبہ کیا۔