سندھ: پولیو ویکسین نہ پلانے والے والدین کے خلاف سخت اقدامات کا عندیہ

کراچی: سندھ میں پولیو کے قطرے پلانے سے انکار کرنے والے والدین کے خلاف کارروائی پر غور کیا جا رہا ہے۔ وزیراعلیٰ سندھ مراد علی شاہ نے جمعہ کو وزیراعلیٰ ہاؤس میں پولیو کے خاتمے سے متعلق اجلاس کی صدارت کرتے ہوئے کہا کہ وہ ایسے والدین کے خلاف کوئی نرمی نہیں برتیں گے جو قومی ذمہ داری سے پہلو تہی کرتے ہیں۔

اجلاس میں اعلان کیا گیا کہ پولیو ویکسین سے انکار کرنے والے والدین کے خلاف سخت اقدامات کیے جائیں گے، جن میں موبائل فون کی سمز بند کرنا، قومی شناختی کارڈ اور پاسپورٹ معطل کرنا شامل ہے تاکہ وہ مواصلاتی اور سفری سہولتوں سے محروم رہیں۔

مزید برآں، وزیراعلیٰ سندھ نے وزیراعلیٰ ہاؤس میں پولیو ویکسین انکار سیل قائم کرنے کا حکم بھی دیا ہے تاکہ اس مسئلے پر فوری اور مربوط کارروائی کی جا سکے۔