وزیراعظم شہباز شریف کا 2 روزہ سرکاری دورہ ملائیشیا،کوالالمپور روانہ

وزیراعظم محمد شہباز شریف دو روزہ سرکاری دورے پر ملائیشیا کے دارالحکومت کوالالمپور کے لیے روانہ ہو گئے ہیں۔ اس موقع پر نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ اور وزیراعظم کے معاون خصوصی طارق فاطمی بھی ان کے ہمراہ ہیں۔

وزیراعظم پاکستان، ملائیشیا کے وزیر اعظم انور ابراہیم کی دعوت پر یہ دورہ کر رہے ہیں، جس میں اعلیٰ سطحی ملاقاتوں اور وفود کی سطح پر بات چیت شامل ہے۔ دورے کے دوران دونوں ممالک کے درمیان مختلف شعبوں میں تعاون کے معاہدوں اور مفاہمتی یادداشتوں پر دستخط متوقع ہیں۔

وزیراعظم شہباز شریف اور وزیر اعظم انور ابراہیم تجارت، آئی ٹی اور ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت میں دوطرفہ تعاون بڑھانے پر بھی بات کریں گے۔ علاوہ ازیں عوام سے عوام کے روابط مضبوط بنانے کے مواقع تلاش کرنے پر بھی گفتگو ہوگی۔