ایبٹ آباد: جائیداد کے تنازعے میں ایک ہی خاندان کے 4 افراد جاں بحق

ایبٹ آباد (نمائندہ امت) قلندر آباد کے علاقے متہال میں جائیداد کے تنازعے پر فائرنگ کے نتیجے میں ایک ہی خاندان کے چار افراد جاں بحق جبکہ چار دیگر شدید زخمی ہو گئے .واقعے کے بعد ملزمان موقع سے فرار ہو گئے۔ ذرائع کے مطابق، اتوار کے روز عبدالحمید ولد یونس سکنہ سوتریاں اپنے بھتیجے کے ہمراہ متہال میں قریبی عزیز کے گھر فاتحہ خوانی کے لیے گئے، جہاں دیگر رشتہ دار بھی موجود تھے۔ گفتگو کے دوران تلخ کلامی جھگڑے میں تبدیل ہوئی اور دیکھتے ہی دیکھتے فریقین کے درمیان اندھا دھند فائرنگ شروع ہو گئی۔ فائرنگ کے نتیجے میں اسنان عرف عبداللہ ولد سلیمان بخش، چن زیب، رفاقت اور نواز پسران انور موقع پر جاں بحق ہو گئے، جبکہ صداقت اور سلیمان بخش سمیت دو دیگر افراد شدید زخمی ہوئے۔ زخمیوں کو فوری طور پر ہسپتال منتقل کیا گیا، جہاں ڈاکٹروں نے چار افراد کے جاں بحق ہونے کی تصدیق کی۔ واقعے کی اطلاع پر تھانہ صدر مانسہرہ پولیس اور ڈی ایس پی جائے وقوعہ پر پہنچ گئے اور تحقیقات کا آغاز کر دیا گیا ہے۔