وزیراعظم شہباز شریف 2 روزہ سرکاری دورے پر ملائیشیا پہنچ گئے، پُرتپاک استقبال

کوالالمپور: وزیراعظم شہباز شریف 2 روزہ سرکاری دورے پر ملائیشیا پہنچ گئے، جہاں بنگا رایا انٹرنیشنل ایئرپورٹ پر ان کا شاندار استقبال کیا گیا۔

ملائیشیا کے وزیر اطلاعات و کمیونیکیشنز فہمی فاضل، پاکستانی ہائی کمشنر سید احسن رضا شاہ اور سفارتی عملے نے وزیراعظم کا خیرمقدم کیا۔ کوالالمپور کی شاہراہیں پاکستانی اور ملائیشیائی پرچموں سے سجائی گئیں۔

شہباز شریف ملائیشیا کے وزیراعظم انور ابراہیم کی دعوت پر گئے ہیں۔ دونوں رہنماؤں کے درمیان ملاقات اور وفود کی سطح پر مذاکرات ہوں گے، جن میں تجارت، آئی ٹی، سرمایہ کاری، تعلیم، توانائی اور ڈیجیٹل معیشت سمیت مختلف شعبوں میں تعاون بڑھانے پر غور کیا جائے گا۔

وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات عطا تارڑ اور معاون خصوصی طارق فاطمی بھی موجود ہیں۔

دورے کے دوران کئی معاہدوں اور مفاہمتی یادداشتوں پر دستخط متوقع ہیں، جو پاکستان اور ملائیشیا کے تعلقات کو مزید مضبوط بنانے کا باعث بنیں گے۔