خاران میں قاضی کورٹ پر حملہ،جج کو اغوا کر لیا گیا

بلوچستان کے ضلع خاران کے علاقے مسکن قلات میں نامعلوم مسلح افراد نے قاضی کورٹ پر حملہ کیا، عمارت کو جلا ڈالا اور جج محمد جان کو اسلحے کے زور پر اغوا کر لیا۔ حملہ آور جج کی سرکاری گاڑی اور ایک وکیل کی گاڑی بھی ساتھ لے گئے۔

پولیس حکام کے مطابق واقعہ پیر کے روز صبح تقریباً ساڑھے 11 بجے اس وقت پیش آیا جب جج عدالت میں مقدمات کی سماعت کر رہے تھے۔ حملہ آوروں نے اندر گھس کر جج اور دیگر عملے کو یرغمال بنایا، عدالتی ریکارڈ اور فرنیچر کو نقصان پہنچایا اور بعدازاں پوری عمارت کو آگ کے حوالے کر دیا۔

ڈی آئی جی رخشاں ریجن عبدالحئی عامر بلوچ نے بتایا کہ عدالت کے تمام حصے آگ سے مکمل طور پر تباہ ہو گئے۔ ان کا کہنا تھا کہ مسلح افراد جج کو زبردستی ساتھ لے گئے اور فرار ہوتے وقت دو گاڑیاں بھی چھین لیں۔

اطلاع ملنے پر سیکیورٹی فورسز اور فرنٹیئر کور کے اہلکار موقع پر پہنچ گئے اور علاقے کو گھیرے میں لے کر سرچ آپریشن شروع کر دیا۔ ابھی تک کسی تنظیم نے اس واقعے کی ذمہ داری قبول نہیں کی۔