اورکزئی میں شہید ہونے والے لیفٹیننٹ کرنل اور میجرکی نماز جنازہ ادا، وزیراعظم، فیلڈ مارشل کی شرکت

راولپنڈی: خیبرپختونخوا کے ضلع اورکزئی میں بھارتی حمایت یافتہ دہشتگرد تنظیم ’فتنہ الخوارج‘ کے خلاف خفیہ آپریشن کے دوران شہید ہونے والے 11 بہادر سپوتوں میں شامل لیفٹیننٹ کرنل جنید طارق اور میجر طیب راحت کی نماز جنازہ چکلالہ راولپنڈی میں ادا کردی گئی۔

پاک فوج کے شعبہ تعلقات عامہ (آئی ایس پی آر) کے مطابق نماز جنازہ میں وزیراعظم پاکستان شہباز شریف، فیلڈ مارشل سید عاصم منیر، وفاقی وزرا، فوجی و سول حکام اور عوامی افراد نے شرکت کی۔

وزیراعظم نے شہدا کو خراج عقیدت پیش کرتے ہوئے کہاکہ پاکستانی قوم دہشتگردی کے اس ناسور کے خلاف مضبوط اور یک جان ہے۔انہوں نے کہاکہ شہدا کی عظیم قربانی قوم کے عزم کو ثابت کرتی ہے کہ وہ ہر صورت مادر وطن کا دفاع کرے گی۔

شہدا کو ان کے آبائی علاقوں میں مکمل فوجی اعزاز کے ساتھ سپرد خاک کیا جائے گا۔