راولپنڈی میں ڈینگی کے تابڑتوڑ حملے، 24 گھنٹوں میں 24 نئے کیسز رپورٹ

 

راولپنڈی: شہر میں ڈینگی کے کیسز میں مسلسل اضافہ جاری ہے، گزشتہ 24 گھنٹوں کے دوران مزید 24 مریضوں میں وائرس کی تصدیق ہوئی ہے۔

ڈسٹرکٹ ہیلتھ اتھارٹی کے مطابق رواں سال اب تک 12 ہزار 819 افراد کے ڈینگی ٹیسٹ مکمل کیے گئے، جن میں سے 865 کیسز مثبت پائے گئے۔

محکمہ صحت کا کہنا ہے کہ اس وقت 58 مریض مختلف اسپتالوں میں زیرِ علاج ہیں، تاہم خوش آئند بات یہ ہے کہ اب تک کسی ہلاکت کی اطلاع موصول نہیں ہوئی۔

ویكٹر سرویلنس رپورٹ کے مطابق رواں سال اب تک 55 لاکھ 90 ہزار 264 گھروں کی چیکنگ کی گئی، جن میں سے 1 لاکھ 75 ہزار 412 گھروں میں ڈینگی لاروا کی موجودگی پائی گئی۔

اسی طرح 15 لاکھ سے زائد عوامی و تجارتی مقامات کی جانچ میں 23 ہزار 536 مقامات پر لاروا برآمد ہوا۔
انسدادِ ڈینگی ایس او پیز کی خلاف ورزی پر 4455 ایف آئی آرز درج کی گئیں، 1850 مقامات سیل، 108 چالان اور 457 جرمانے کیے گئے۔

ڈسٹرکٹ ہیلتھ آفیسر ڈاکٹر جواد احمد کے مطابق ڈھوک کشمیریاں، پیرودھائی، خیابان سرسید، چک جلال دین، دھمیال، رتہ امرال اور رحمت آباد سمیت مختلف علاقوں میں ڈینگی کیسز بڑھ رہے ہیں۔