پاک فوج کا کارنامہ: عطیہ کردہ کورنیہ سے دو سپاہیوں کی بینائی بحال

راولپنڈی: پاک فوج کے ماہر سرجنز نے ملکی تاریخ میں ایک تاریخی کامیابی حاصل کرتے ہوئے خاتون کے عطیہ کردہ کورنیہ سے دو بہادر سپاہیوں کی بینائی بحال کر دی۔

تفصیلات کے مطابق آرمڈ فورسز انسٹی ٹیوٹ آف اوپتھامولوجی (اے ایف آئی او) راولپنڈی کے ماہر ڈاکٹروں نے مرحومہ مسز سید ظفر مہدی عسکری کی وصیت کے مطابق ان کے عطیہ کردہ کورنیہ دو زخمی فوجیوں، سپاہی علی اللہ اور سپاہی فلک شیرکی آنکھوں میں کامیابی سے منتقل کیے۔ دونوں سپاہی دہشت گردی کے خلاف آپریشن کے دوران شدید زخمی ہو کر بینائی سے محروم ہو گئے تھے۔

جدید آلات اور نازک طبی مہارت کے ساتھ مکمل ہونے والی سرجری کے بعد دونوں سپاہیوں کی بینائی بحال ہو گئی، جسے ماہرین نے پاکستان میں بصارت کی بحالی کے شعبے میں ایک اہم سنگِ میل قرار دیا ہے۔

مرحومہ کے شوہر میجر جنرل (ر) سید ظفر مہدی عسکری کی بیٹی زہرا مہدی نے کہا کہ والدہ کی یہ قربانی ان کے خاندان کے لیے باعثِ فخر اور صدقۂ جاریہ ہے۔

پاک فوج کے ترجمان نے اے ایف آئی او کے ماہرین کو خراجِ تحسین پیش کرتے ہوئے کہا کہ یہ کامیابی انسانیت، قربانی اور امید کی روشن مثال ہے۔

طبی ماہرین کے مطابق پاکستان میں عطیۂ اعضاء سے متعلق آگاہی میں اضافہ ہو رہا ہے، اور یہ کامیاب آپریشن مستقبل میں بینائی سے محروم افراد کے لیے نئی امید ثابت ہوگا۔ اے ایف آئی او نے اعلان کیا ہے کہ وہ اس کامیابی کی بنیاد پر آنکھوں کے عطیات سے متعلق قومی مہم شروع کرنے کی تیاری کر رہا ہے تاکہ زیادہ سے زیادہ افراد دوبارہ بصارت کی نعمت سے مستفید ہو سکیں۔