گلگت بلتستان میں 16 نئی تحصیلوں کے قیام کی منظوری

گلگت بلتستان کی صوبائی کابینہ نے متعدد اہم فیصلے کرتے ہوئے 16 نئی تحصیلوں کے قیام، محکمہ صحت کے امور کو ڈیجیٹل نظام میں منتقل کرنے اور 54 ایجوکیشن فیلوز کی بھرتی کی منظوری دے دی۔

وزیراعلیٰ گلگت بلتستان گلبر خان کی زیرِ صدارت کابینہ اجلاس کے بعد صوبائی وزیر ایکسائز اینڈ ٹیکسیشن رحمت خالق اور معاونِ خصوصی اطلاعات ایمان شاہ نے بریفنگ دیتے ہوئے بتایا کہ اجلاس میں سونیوال قبائل کی رجسٹریشن، بڑے ہوٹلز میں ٹھہرنے والے غیر مقامی افراد پر ٹیکس عائد کرنے اور گندم کی قیمت میں بتدریج اضافے کے لیے کمیٹی تشکیل دینے کے فیصلے کیے گئے ہیں۔

اجلاس میں عطا آباد جھیل کی 354 کنال زمین کو عوامی ملکیت قرار دیتے ہوئے متاثرین کو معاوضہ دینے کا بھی فیصلہ کیا گیا۔

مزید برآں، گلگت بلتستان کے وفاقی سطح پر درپیش مسائل کے حل کے لیے ایک خصوصی کمیٹی قائم کرنے کی منظوری بھی دی گئی۔ صوبائی وزیر رحمت خالق کے مطابق، گندم کی قیمت اور ہوٹل ٹیکس سے متعلق سفارشات جلد پیش کی جائیں گی۔