سپن بولدک پر افغانستان کے نئے حملے ناکام، تقریباً 20 افغان طالبان اور فتنہ الخوارج ہلاک

سیکیورٹی ذرائع کے مطابق افغان طالبان اور فتنہ الخوارج نے علی الصبح چمن کے علاقے سپن بولدک میں 3 مختلف مقامات پر حملے کی کوشش کی، تاہم پاک فوج کی بروقت اور مؤثر جوابی کارروائی نے دہشتگردوں کو پسپا ہونے پر مجبور کر دیا۔

ذرائع کے مطابق حملہ آوروں نے دیہات اور معصوم شہریوں کو ڈھال کے طور پر استعمال کیا۔ جوابی کارروائی میں 15 سے 20 افغان طالبان ہلاک ہوئے، جبکہ دہشتگردوں نے پسپائی کے دوران پاک افغان دوستی گیٹ کو اپنی جانب سے دھماکے سے اڑا دیا۔

سیکیورٹی ذرائع کا کہنا ہے کہ گیٹ کو تباہ کرنا اس بات کا ثبوت ہے کہ افغان طالبان تجارت اور مقامی آمد و رفت کے مخالف ہیں۔

ذرائع نے مزید بتایا کہ پاک فوج نے گزشتہ رات کرم سیکٹر پر افغان طالبان اور فتنہ الخوارج کے ایک اور حملے کی کوشش کو بھی ناکام بنایا۔ جوابی کارروائی میں دشمن کی 8 پوسٹیں اور 6 ٹینک بمعہ عملہ تباہ کیے گئے، جبکہ متعدد دہشتگرد مارے گئے اور امریکی ساختہ اسلحہ قبضے میں لیا گیا۔

سیکیورٹی ذرائع کے مطابق کرم سیکٹر میں فی الحال مکمل خاموشی ہے تاہم اسپن بولدک کے علاقے میں افغان طالبان اور فتنہ الخوارج کے دوبارہ جمع ہونے کی اطلاعات موصول ہو رہی ہیں۔