سیکیورٹی فورسز نے مختلف کارروائیوں میں 20 خوارجی جہنم واصل کر دیے

شمالی وزیرستان، لکی مروت: سیکیورٹی فورسز نے مختلف کارروائیوں میں 20 خوارجی جہنم واصل کر دیے۔

 پہلی کارروائی میں شمالی وزیرستان میں سکیورٹی فورسز نے انٹیلی جنس معلومات پر آپریشن کرتے ہوئے 6 خوارج جہنم واصل کر دیئے جبکہ خودکش حملہ ناکام بناتے ہوئے 6خوارج ہلاک کر دیئے۔

شمالی وزیرستان کے علاقے میر علی میں خوارج کا خودکش حملہ ناکام ہوگیا جس سے 6 خوارجی ہلاک ہوگئے۔

سیکیورٹی ذرائع کے مطابق خوارج نے سیکیورٹی فورسز پر خودکش حملے کی کوشش کی تھی، ایک خارجی نے بارود سے بھری گاڑی سیکیورٹی فورسز کے کیمپ کی دیوار سے ٹکرائی جو دھماکے سے پھٹ گئی۔

پانچ مزید خوارجیوں نے کیمپ کے اندر داخل ہونے کی کوشش کی، تاہم بروقت اور بہادرانہ کارروائی کے نتیجے میں پانچوں خوارجی کیمپ کے باہر ہی ہلاک کردیے گئے۔اس تمام کارروائی میں سیکیورٹی فورسز کا کسی قسم کا کوئی نقصان نہیں ہوا۔

سیکیورٹی فورسز نےسینکڑوں کلو بارود سے بھری گاڑی پکڑ لی

سیکورٹی ذرائع  کے مطابق سیکیورٹی فورسز نے فتنہ الخوارج کی سینکڑوں کلو گرام بارود سے بھری گاڑی پکڑ لی

اطلاعات کے مطابق فتنہ الخوارج نے گاڑی کو باجوڑ میں کسی سول آبادی میں جا کے دھماکے سے اڑانا تھا ،سیکیورٹی فورسز نے گاڑی کو تباہ کر دیا

سیکورٹی ذرائع کے مطابق سیکیورٹی فورسز یا عوام کا کسی قسم کا کوئی نقصان نہیں ہوا، یہ بارود افغانستان سے پاکستان اسمگلنگ کے مال کے ساتھ لایا جاتا ہے ۔

سیکورٹی ذرائع کا کہنا ہے ان شاء اللہ، نیشنل ایکشن پلان کے تحت آخری خوارجی کے خاتمے تک عوام اور افواجِ پاکستان ملک کے دفاع کے لیے یونہی ڈٹی رہیں گی۔

دتہ خیل میں بھی سیکیورٹی فورسز کی کارروائی، 6 خوارج ہلاک

علاوہ ازیں شمالی وزیرستان کے علاقے دتہ خیل میں بھی سیکیورٹی فورسز کی کارروائی کے دوران 6 خوارج ہلاک کردیے گئے۔

سیکیورٹی ذرائع کے مطابق ٹنگ کلی (دتہ خیل) میں گزشتہ روز انٹیلی جنس بیسڈ آپریشن کیا گیا، سیکیورٹی فورسز نے اطلاعات کے پیشِ نظر 8 سے 10 روز تک علاقے کی بھرپور نگرانی کی اور 16 اکتوبر کو دہشتگردوں کو گھیرے میں لیا۔

سیکیورٹی ذرائع کا بتانا ہے کہ فائرنگ کے تبادلے میں 6 دہشتگرد جہنم واصل جبکہ 3 زخمی ہوئے، ہلاک ہونے والے دہشتگردوں میں فتنہ الخوارج کا کمانڈر محبوب عرف محمد بھی شامل ہے۔

ایک اور کارروائی میں سیکیورٹی فورسز نے 16 اکتوبر کو لکی مروت کے علاقے سلطان خیل میں انٹیلی جنس اطلاعات کی بنیاد پر کامیاب کارروائی کرتے ہوئے 8 انتہائی مطلوب خوارجین کو جہنم واصل کر دیاؕ

سیکیورٹی ذرائع نے بتایا کہ علاقے میں افغان طالبان کی پراکسی خوارج کی موجودگی کی اطلاع پر کارروائی عمل میں لائی گئی۔

ذرائع کے مطابق فورسز نے سلطان خیل اور طوفان والا کے علاقوں میں فضائی اور زمینی نگرانی شروع کی، نگرانی کے دوران خوارج کی نقل و حرکت کی نشاندہی ہونے پر فوری کارروائی کی گئی۔

سکیورٹی ذرائع کے مطابق آپریشن کے دوران دہشت گردوں کے قبضے سے بھاری مقدار میں اسلحہ اور بارود بھی برآمد ہوا۔

سیکیورٹی ذرائع کے مطابق گزشتہ چار روز کے دوران افغان طالبان کے بھیجے گئے 108 خوارجیوں کو جہنم واصل کیا جا چکا ہے

سیکیورٹی ذرائع کا کہنا ہے کہ آخری خوارج کے خاتمے تک افواج اور قانون نافذ کرنے والے ادارے ملک کے دفاع کیلئے ڈٹے رہیں گے۔