پنجاب ریونیو اتھارٹی میں ٹیکس کلیکشن بڑھانے کے لیے سپیشل یونٹ قائم

لاہور: ٹیکس کلیکشن کو مزید مؤثر بنانے کے لیے پنجاب ریونیو اتھارٹی (PRA) میں ایک سپیشل یونٹ قائم کرنے کا فیصلہ کیا گیا ہے۔

وزیراعلیٰ پنجاب مریم نواز شریف کی زیر صدارت ریونیو کلیکشن کے اجلاس میں اس یونٹ کے قیام کی منظوری دی گئی، جس میں فیکٹوریل، ٹیکس کنسلٹنٹ، لیگل ایکسپرٹ اور ڈیٹا اینالسٹ شامل ہوں گے۔

اجلاس میں پنجاب ریونیو اتھارٹی کے دائرہ کار کو 30 اضلاع تک بڑھانے اور 130 انفورسمنٹ افسران کی بھرتی کی اصولی منظوری دی گئی۔ وزیراعلیٰ نے اضلاع میں ریونیو اتھارٹی کی توسیع کے لیے 30 اکتوبر تک کی ڈیڈ لائن مقرر کی۔

پنجاب میں ریونیو بڑھانے کے لیے 19 نئے سیکٹرز شامل کرنے کا بھی جائزہ لیا گیا، اور اضافی ذمہ داریاں اے ڈی سی جی کو تفویض کی گئی ہیں۔ پی آر اے نے ٹیکس دہندگان کے لیے سہولت ایپ بھی متعارف کرا دی۔

وزیراعلیٰ مریم نواز شریف نے ٹیکس ریونیو میں شفافیت یقینی بنانے پر زور دیتے ہوئے کہا کہ ایمانداری سے ٹیکس ادا کرنے والوں کو پریشان نہ کیا جائے اور نئے سیکٹرز متعارف کرائے جائیں۔