کسٹمز انفورسمنٹ کراچی اور رینجرز کا بڑا آپریشن،کروڑوں روپے کی غیر ملکی اشیاء برآمد

کراچی: کسٹمز انفورسمنٹ کراچی اور پاکستان رینجرز سندھ نے مشترکہ کارروائی کرتے ہوئے کروڑوں روپے مالیت کی غیر ملکی اشیاء برآمد کر لیں۔

ترجمان کے مطابق کلکٹریٹ آف کسٹمز (انفورسمنٹ) کراچی کی اے ایس او ٹیم نے قابلِ اعتماد ذرائع سے اطلاع ملنے پر 16 اور 17 اکتوبر 2025 کی درمیانی شب سہراب گوٹھ میں الاصف اسکوائر کے قریب دکان نما گوداموں پر چھاپہ مارا۔

کارروائی کے دوران اسمگل شدہ غیر ملکی سگریٹس، گٹکا، بھارتی نسوار اور ایرانی خوردنی تیل کی بھاری مقدار برآمد ہوئی۔

برآمد شدہ سامان میں شامل ہیں:

غیر ملکی سگریٹس کے 8,509 ڈنڈے
غیر ملکی گٹکے کے 1,829 پیکٹ
بھارتی ساختہ نسوار کے 327 پیکٹ
ایرانی خوردنی تیل کی 92 بوتلیں

ضبط شدہ اشیاء کی کل مالیت تقریباً 32.6 ملین روپے بتائی گئی ہے۔

کسٹمز حکام کے مطابق، اسمگلنگ کی روک تھام اور قومی معیشت کے تحفظ کے لیے کارروائیاں جاری رہیں گی۔ یہ کامیاب آپریشن کسٹمز انفورسمنٹ کراچی اور پاکستان رینجرز سندھ کے مؤثر اشتراکِ عمل کا مظہر ہے۔