دیوالی کا تہوار باہمی محبت اور اتحاد کا پیغام دیتا ہے،مریم نواز

لاہور: وزیراعلیٰ پنجاب مریم نواز شریف نے دیوالی کے موقع پر ہندو برادری کو مبارکباد دیتے ہوئے کہا کہ دیوالی کا دیپ محبت، ہم آہنگی اور بھائی چارے کی جوت جگاتا ہے۔

اپنے پیغام میں وزیراعلیٰ پنجاب نے کہا کہ اقلیتوں کی فلاح و بہبود کے لیے صوبائی حکومت اہم اقدامات کر رہی ہے۔ ان کے مطابق اقلیتوں کے لیے سپیشل منیاریٹی کارڈ جاری کیا جا چکا ہے جبکہ محفوظ پنجاب ویژن کے تحت منیاریٹی ورچوئل پولیس اسٹیشن بھی قائم کیا جا رہا ہے۔

مریم نواز شریف نے کہا کہ دیوالی کا تہوار باہمی محبت اور اتحاد کا پیغام دیتا ہے۔ پاکستان ایک خوبصورت گلدستہ ہے جس میں مختلف مذاہب اور عقائد کے لوگ اخوت و بھائی چارے سے رہتے ہیں۔

واضح رہے کہ پاکستان سمیت دنیا بھر میں ہندو برادری آج دیوالی کا تہوار منا رہی ہے، جسے روشنیوں، خوشیوں اور اچھائی کی برائی پر فتح کی علامت سمجھا جاتا ہے۔

یہ تہوار نہ صرف ہندو برادری بلکہ سکھ مت اور جین مت کے ماننے والے بھی مذہبی جوش و خروش سے مناتے ہیں۔ برصغیر میں دیوالی تاریخی طور پر تمام مذاہب کے ماننے والوں کے لیے امن اور محبت کا تہوار رہی ہے۔

دیوالی، روشنیوں اور محبت کا تہوار، باہمی احترام اور بھائی چارے کا خوبصورت پیغام ہے۔