وزیر داخلہ کی چیئرمین سنی تحریک سے ملاقات، مذہبی ہم آہنگی پر زور

وفاقی وزیر داخلہ محسن نقوی نے چیئرمین سنی تحریک محمد ثروت اعجاز قادری سے ملاقات کی، جس میں مذہبی ہم آہنگی کے فروغ اور علمائے کرام کے مثبت کردار پر بات چیت ہوئی۔

ملاقات میں سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی شامل تھے۔ محسن نقوی نے علمائے کرام کی خدمات کو سراہتے ہوئے کہا کہ مدارس یا مساجد کی بندش کے حوالے سے پھیلایا جانے والا پروپیگنڈا بے بنیاد ہے اور کسی بھی مدرسے یا مسجد کو بند نہیں کیا جائے گا۔

وزیر داخلہ نے کہا کہ دین اسلام امن اور محبت کا درس دیتا ہے اور تشدد یا شرانگیزی کی کوئی گنجائش نہیں ہے۔ انہوں نے زور دیا کہ پاکستان کی ترقی کے لیے سب کو مثبت کردار ادا کرنے کی ضرورت ہے اور قانون کے دائرے میں ہر کسی کو احتجاج کا حق حاصل ہے۔

چیئرمین سنی تحریک محمد ثروت اعجاز قادری نے اس موقع پر مذہبی ہم آہنگی کے فروغ کے لیے مکمل تعاون کی یقین دہانی کرائی۔