بین الاقوامی انٹرنیٹ کیبل میں فالٹ تاحال برقرار ہے،سیکرٹری آئی ٹی کا اعتراف

سیکرٹری انفارمیشن ٹیکنالوجی نے قومی اسمبلی کی قائمہ کمیٹی کے اجلاس میں بتایا کہ بین الاقوامی انٹرنیٹ کیبل میں فالٹ تاحال برقرار ہے، تاہم کنسورشیم کی جانب سے مرمتی کام جاری ہے۔
ان کا کہنا تھا کہ پاکستان کی انٹرنیٹ ٹریفک کو متبادل روٹس پر منتقل کر دیا گیا ہے تاکہ خدمات میں تعطل کم سے کم ہو۔

اجلاس میں ملک بھر میں ناقص موبائل سگنلز پر بھی بات چیت ہوئی، جس پر کمیٹی نے اگلے اجلاس میں پی ٹی اے حکام کو طلب کرنے کا فیصلہ کیا۔

اسلام آباد آئی ٹی پارک منصوبے پر بھی تفصیلی بریفنگ دی گئی۔ پروجیکٹ ڈائریکٹر کے مطابق منصوبے پر 80 فیصد کام مکمل ہو چکا ہے۔

وفاقی وزیر آئی ٹی شزہ فاطمہ نے بتایا کہ یہ منصوبہ کورین کمپنی کے تعاون سے مکمل کیا جا رہا ہے، تاہم تاخیر کے باعث وزیراعظم نے انکوائری کا حکم دیا ہے۔
انہوں نے مزید کہا کہ اسپیکٹرم کی قلت اور قانونی تنازعات کے باعث نیٹ ورک کو مسائل درپیش ہیں۔
اس وقت ملک 274 میگا ہرٹز اسپیکٹرم پر چل رہا ہے جو ناکافی ہے، حکومت دسمبر یا جنوری تک نیا اسپیکٹرم آکشن کرانے کی کوشش کر رہی ہے۔