محکمہ داخلہ پنجاب کا غیر قانونی اسلحہ کے خلاف ایکشن, 28 اسلحہ ڈیلرز کے لائسنس منسوخ

لاہور: پنجاب میں اسلحے کی غیر قانونی خرید و فروخت پر زیرو ٹالرنس پالیسی پر عملدرآمد شروع، محکمہ داخلہ پنجاب کی جانب سے 28 اسلحہ ڈیلرز کے لائسنس منسوخ کر دیئے گئے۔

ترجمان کے مطابق  محکمہ داخلہ پنجاب کے جوڈیشل ونگ نے جعلی ڈیلرز کی دکانیں سیل اور ایف آئی آر درج کر لی گئیں۔ پنجاب میں 511 اسلحہ ڈیلرز نے لائسنس کی توثیق کے لئے درخواست دی ، جن کی مکمل سکروٹنی کے بعد 393 اسلحہ ڈیلرز کے لائسنس کی تصدیق کر دی گئی ہے اور انہیں گرین سرٹیفکیٹس جاری کیے گئے ہیں۔محکمہ داخلہ میں 90 اسلحہ ڈیلرز کے کاغذات کی اسکروٹنی جاری ہے ، جن میں سے 44 اسلحہ ڈیلرز کی سماعت مکمل ہو گئی جبکہ 46 کی سماعت جلد مکمل کر لی جائے گی۔

ترجمان محکمہ داخلہ پنجاب نے بتایا کہ شفاف اور منصفانہ طریقۂ کار کے تحت تمام کیسز کی جانچ پڑتال کی جا رہی ہے۔  پنجاب میں 10 لاکھ 12 ہزار 454 افراد کے پاس انفرادی اسلحہ لائسنس موجود ہیں۔ پنجاب میں سکیورٹی کمپنیوں کیلئے 37 ہزار 918 اسلحہ لائسنس جاری کیے گئے جبکہ مختلف اداروں کے نام پر رجسٹرڈ اسلحہ لائسنسز کی تعداد 42 ہزار 272 ہے۔

ترجمان کے مطابق پنجاب میں مجموعی طور پر اسلحہ لائسنسز کی کل تعداد 10 لاکھ 92 ہزار 644 ہے۔ اسلحہ لائسنسز کا تمام ریکارڈ نادرا کی مدد سے آن لائن کیا جارہا ہے۔