محسن نقوی کاڈپلومیٹک انکلیو میں پیڈل ٹینس کورٹ اورفٹنس ایرینا کاافتتاح

اسلام آباد: وفاقی وزیر داخلہ محسن نقوی نے ڈپلومیٹک انکلیو میں پیڈل ٹینس کورٹ اور فٹنس ایرینا کا افتتاح کر دیا۔

افتتاحی تقریب میں وفاقی وزیر سمندر پار پاکستانی چوہدری سالک حسین، سینیٹر فیصل سلیم، چیئرمین سی ڈی اے محمد علی رندھاوا اور قائم مقام امریکی سفیر نیٹلی بیکر نے بھی شرکت کی۔

افتتاح کے بعد وزیر داخلہ نے امریکی سفیر، وفاقی وزیر چوہدری سالک حسین اور چیئرمین سی ڈی اے کے ہمراہ پیڈل ٹینس کھیل کر افتتاحی سرگرمی میں حصہ لیا۔

محسن نقوی نے کہا کہ پیڈل ٹینس کورٹ ڈپلومیٹک کمیونٹی کو کھیل اور تفریح کی معیاری سہولت فراہم کرے گا اور کھیلوں و صحت مند سرگرمیوں کو فروغ دینا حکومت کی ترجیح ہے۔

انہوں نے بتایا کہ ڈپلومیٹک انکلیو کی تزئین و آرائش کا عمل شروع کر دیا گیا ہے اور جلد مکمل کر لیا جائے گا، جبکہ ڈپلومیٹک کمیونٹی کو تمام ممکنہ سہولتیں فراہم کرنے میں کوئی کسر نہیں چھوڑی جائے گی۔

وفاقی وزیر نے مزید کہا کہ اسلام آباد کو عالمی معیار کا دارالحکومت بنانا حکومت کا مقصد ہے اور کھیل و ثقافت لوگوں کو جوڑنے کا بہترین ذریعہ ہیں۔

تقریب میں چیئرمین سی ڈی اے، ڈپٹی کمشنر اسلام آباد اور دیگر اعلیٰ حکام بھی موجود تھے۔