شمالی وزیرستان:سیکیورٹی فورسز کی کارروائی،3 بھارتی سپانسر شدہ خوارج ہلاک

شمالی وزیرستان، جھلر: پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے جھلر میں سیکیورٹی فورسز نے ایک انسداد دہشت گردی آپریشن کے دوران تین بھارتی سپانسر شدہ خوارج ہلاک کر دیے اور خودکش حملے کے لیے تیار کی گئی گاڑی کو تباہ کر دیا۔

آئی ایس پی آر کے مطابق بھارتی پراکسی اور فتنہ الخوارج سے تعلق رکھنے والے خوارج کی موجودگی کی مصدقہ اطلاعات موصول ہونے پر فورسز نے انٹیلی جنس بیسڈ آپریشن کیا۔ آپریشن کے دوران سیکیورٹی فورسز نے خوارج کے ٹھکانے کو مؤثر انداز میں نشانہ بنایا اور ممکنہ خودکش حملے کو ناکام بنایا۔

بیان میں مزید کہا گیا کہ علاقے میں کسی بھی ممکنہ خارجی یا بھارتی حمایت یافتہ دہشت گرد کے خاتمے کے لیے کلئیرنس آپریشن جاری ہے اور تلاشی کے عمل کے دوران کسی بھی دیگر خطرہ کو ختم کرنے کی کوششیں کی جا رہی ہیں۔

آئی ایس پی آر نے کہا کہ سیکیورٹی فورسز اور قانون نافذ کرنے والے ادارے وژن “عزم استحکم” کے تحت دہشت گردی کے خاتمے کی کوششیں جاری رکھے ہوئے ہیں اور ہر قیمت پر دہشت گردی کا خاتمہ یقینی بنایا جائے گا۔