خیبر پختونخوا اسمبلی میں پی ٹی آئی کا امن جرگہ بلانے کا فیصلہ

پشاور: پاکستان تحریک انصاف نے خیبر پختونخوا اسمبلی میں امن جرگہ بلانے کا فیصلہ کیا ہے، جس کا مقصد دہشت گردی کے خاتمے اور پائیدار امن کے قیام کے لیے متفقہ حکمتِ عملی تیار کرنا ہے۔

وزیرِاعلیٰ ہاؤس پشاور میں پی ٹی آئی کی سینئر قیادت کا اہم اجلاس ہوا، جس میں چیئرمین پی ٹی آئی بیرسٹر گوہر، وزیرِاعلیٰ سہیل آفریدی، صوبائی صدر جنید اکبر، اسد قیصر اور دیگر رہنماؤں نے شرکت کی۔

اجلاس میں صوبے کی مجموعی امن و امان کی صورتحال کا تفصیلی جائزہ لیا گیا اور فیصلہ کیا گیا کہ خیبر پختونخوا اسمبلی میں ایک وسیع البنیاد امن جرگہ منعقد کیا جائے گا۔

ذرائع کے مطابق امن جرگے میں سابق وزرائے اعلیٰ، گورنرز، علمائے کرام، جرگہ مشران، سول سوسائٹی، وکلاء اور دیگر اہم شخصیات کو مدعو کیا جائے گا تاکہ دہشت گردی کے خاتمے اور دیرپا امن کے لیے مشترکہ لائحہ عمل تشکیل دیا جا سکے۔

وزیرِاعلیٰ سہیل آفریدی نے کہا کہ پولیس کو جدید تربیت، آلات اور وسائل کی فراہمی حکومت کی اولین ترجیح ہے۔

اس سے قبل باڑہ میں ایک امن جرگے سے خطاب کرتے ہوئے سہیل آفریدی نے کہا تھا کہ ضم اضلاع کے بقایاجات فوری ادا کیے جائیں، ہمیں بھیک نہیں بلکہ اپنا حق چاہیے۔ انہوں نے اعلان کیا کہ ہر ضلع میں امن جرگے منعقد کیے جائیں گے۔