اسٹیٹ بینک آف پاکستان آج نئی مانیٹری پالیسی جاری کرے گا

اسٹیٹ بینک آف پاکستان آج نئی مانیٹری پالیسی جاری کرے گا۔ مرکزی بینک کی زری پالیسی کمیٹی کا اجلاس گورنر جمیل احمد کی زیرِ صدارت منعقد ہوگا، جس میں ملکی و عالمی معاشی حالات، افراطِ زر اور شرحِ نمو سمیت دیگر اہم معاشی اشاریوں کا جائزہ لیا جائے گا۔

ذرائع کے مطابق، اجلاس کے اختتام پر اسٹیٹ بینک پالیسی ریٹ (شرحِ سود) سے متعلق باضابطہ اعلان کرے گا۔

ماہرینِ معیشت کا کہنا ہے کہ موجودہ افراطِ زر اور معاشی استحکام کے پیشِ نظر شرحِ سود میں کسی تبدیلی کا امکان نہیں۔ ان کے مطابق، مانیٹری پالیسی میں تسلسل برقرار رہنے کا امکان زیادہ ہے۔

ایک حالیہ سروے کے مطابق، 88 فیصد ماہرین کا خیال ہے کہ پالیسی ریٹ 11 فیصد پر برقرار رہے گا، جب کہ 10 فیصد تجزیہ کاروں نے 50 بیسز پوائنٹس کی کمی کا امکان ظاہر کیا ہے۔ صرف 2 فیصد ماہرین کے مطابق پالیسی ریٹ میں ایک فیصد کمی ممکن ہے۔

اس وقت ملک میں بنیادی شرحِ سود 11 فیصد ہے جو گزشتہ کئی ماہ سے مستحکم ہے۔ ماہرین کے مطابق، اگر مہنگائی میں مزید کمی اور زرمبادلہ کے ذخائر میں بہتری آتی ہے تو آئندہ مہینوں میں شرحِ سود میں کمی کے امکانات بڑھ سکتے ہیں۔