علیمہ خان کے خلاف پانچویں مرتبہ وارنٹ گرفتاری جاری

راولپنڈی: انسداد دہشتگردی عدالت نے علیمہ خان کے خلاف پانچویں مرتبہ ناقابل ضمانت وارنٹ گرفتاری جاری کر دیے ہیں۔

عدالت کے جج امجد علی شاہ نے 26 نومبر کو ہونے والے احتجاج کے مقدمے کی سماعت کے دوران علیمہ خان سمیت 11 ملزمان کے خلاف کارروائی کی۔ علیمہ خان پانچویں وارنٹ کے باوجود عدالت پیش نہیں ہوئیں۔

استغاثہ سے 5 گواہان اور دیگر 10 ملزمان عدالت میں پیش ہوئے جبکہ اسپیشل پراسیکیوٹر ظہیر شاہ بھی ٹیم کے ہمراہ موجود تھے۔ علیمہ خان کے وکیل عدالت میں حاضر نہ ہوئے، جس پر عدالت نے کیس کی سماعت 30 اکتوبر تک ملتوی کر دی۔

عدالت نے علیمہ خان کا شناختی کارڈ، پاسپورٹ اور بینک اکاؤنٹس پہلے ہی بلاک کرنے کا حکم دیا ہوا ہے اور نادرا، پاسپورٹ امیگریشن اور اسٹیٹ بینک سے رپورٹ طلب کی گئی ہے۔