گلیشیئرز ٹو فارمزپروگرام کیلئے25 کروڑ ڈالر کی منظوری

اسلام آباد: ایشیائی ترقیاتی بینک (اے ڈی بی) نے اپنے گرین کلائمیٹ فنڈ (جی سی ایف) کے تحت ’’گلیشیئرز ٹو فارمز‘‘ پروگرام کے لیے 25 کروڑ ڈالر کی منظوری دے دی ہے۔

اعلامیے کے مطابق یہ پروگرام پاکستان سمیت 9 ممالک میں شروع کیا جائے گا، جس کا مقصد گلیشیئرز پر انحصار کرنے والے علاقوں میں پانی اور زرعی نظام کو بہتر بنانا ہے۔

پروگرام کے تحت آبپاشی کے مؤثر نظام، پانی ذخیرہ کرنے کی گنجائش اور واٹر شیڈ مینجمنٹ کو فروغ دیا جائے گا۔ اے ڈی بی کے مطابق اگلے 10 برسوں میں 3.25 ارب ڈالر کی سرمایہ کاری کی جائے گی تاکہ خطے میں موسمیاتی تبدیلی کے اثرات سے نمٹنے کی استعداد بڑھائی جا سکے۔

اعلامیے میں بتایا گیا کہ گلیشیئرز کے تیزی سے پگھلنے سے خشک سالی، سیلاب اور زرعی نقصان کے خطرات بڑھ گئے ہیں، اور یہ پروگرام تقریباً 1 کروڑ 30 لاکھ افراد — خصوصاً کسانوں اور پہاڑی علاقوں میں رہنے والی آبادی — کو براہِ راست فائدہ پہنچائے گا۔

پروگرام میں چار بڑے دریائی حوض — نارین، پیانج، کُورا اور سوات — شامل ہوں گے۔ اس کے ذریعے موسمیاتی تحقیق، جدید وارننگ سسٹم اور مانیٹرنگ ٹیکنالوجی کو قومی ترقیاتی منصوبوں میں شامل کیا جائے گا۔

اس منصوبے کے تحت پانی کی کمی اور شدید گرمی سے متاثرہ علاقوں میں سماجی تحفظ کو مضبوط بنانے اور خواتین کی زیرِ قیادت زرعی کاروباروں کے فروغ کے لیے مقامی بینکوں کو سہولیات فراہم کی جائیں گی۔

اے ڈی بی کے مطابق گلیشیئرز کا پگھلاؤ خطے کے لیے ایک بڑا ماحولیاتی چیلنج ہے، اور جی سی ایف کی مدد سے یہ پروگرام منتشر منصوبوں کے بجائے ایک منظم اور لچکدار نظام قائم کرے گا۔

اعلامیے کے مطابق، گرین کلائمیٹ فنڈ دنیا کا سب سے بڑا ماحولیاتی مالیاتی ادارہ ہے، جس نے اپنے 43 ویں بورڈ اجلاس میں اس پروگرام کی منظوری دی۔ 2024 میں جی سی ایف کی معاونت سے کی جانے والی تحقیقات نے اس منصوبے کی سائنسی بنیاد فراہم کی۔