وزیراعظم آزادکشمیر کیخلاف تحریک عدم اعتماد پرپی پی اور ن لیگ میں ڈیڈلاک ختم

مظفرآباد میں وزیراعظم آزادکشمیر چوہدری انوار الحق کے خلاف تحریک عدم اعتماد کے معاملے میں پیپلزپارٹی اور ن لیگ کے درمیان ڈیڈلاک ختم ہوگیا ہے۔

ذرائع کے مطابق ن لیگ نے قبل ازوقت انتخابات کی شرط پر وزیراعظم کے خلاف عدم اعتماد میں حمایت کی یقین دہانی کرائی ہے۔ نئے وزیراعظم کے حوالے سے بتایا گیا کہ وہ آئینی عہدوں پر زیرالتواء تعیناتیاں کر کے انتخابات کی راہ ہموار کرے گا۔

تحریک عدم اعتماد جمع ہونے کے بعد ن لیگ کے وزراء مستعفی ہوں گے اور مسلم لیگ ن عدم اعتماد میں ووٹ ڈالنے کے بعد اپوزیشن بینچز پر بیٹھے گی۔ ذرائع کا کہنا ہے کہ اگر وزیراعظم چوہدری انوار الحق مستعفی نہ ہوئے تو کسی بھی وقت تحریک عدم اعتماد لائی جا سکتی ہے۔

واضح رہے کہ وزیراعظم کے خلاف عدم اعتماد کے لیے 27 اراکین کی سادہ اکثریت درکار ہے، جبکہ مسلم لیگ ن کی حمایت کے بعد پیپلزپارٹی نے 36 اراکین کی حمایت کا دعویٰ کیا ہے۔