بانی پی ٹی آئی سے ملاقات کے لیے الگ الگ فہرستیں جاری

اسلام آباد: بانی پاکستان تحریک انصاف عمران خان سے آج ملاقات کے لیے دو مختلف فہرستیں سامنے آگئی ہیں جن میں شامل ناموں پر اختلاف پیدا ہوگیا ہے۔

ذرائع کے مطابق سلمان اکرم راجہ نے بیرسٹر علی ظفر کی جانب سے جاری کردہ فہرست کے جواب میں ایک الگ فہرست جاری کر دی ہے۔ سلمان اکرم راجہ کی فہرست میں سہیل آفریدی، بابر سلیم سواتی، اسد قیصر، جنید اکبر اور تیمور سلیم جھگڑا کے نام شامل ہیں۔

دوسری جانب علی ظفر کی فہرست میں سہیل آفریدی، جنید اکبر، شاہد خٹک، عون عباس، تیمور سلیم اور زر عالم خان کے نام درج ہیں۔

پارٹی ذرائع کا کہنا ہے کہ ملاقات کے لیے ناموں کی حتمی فہرست تیار کرنے کی ذمہ داری بیرسٹر علی ظفر کو دی گئی تھی۔

اسی دوران، وزیرِ اعلیٰ خیبر پختونخوا سہیل آفریدی نے عمران خان سے جیل میں ملاقات نہ ہونے کے معاملے پر چیف جسٹس اسلام آباد ہائی کورٹ کو ایک خط لکھا ہے۔ خط میں انہوں نے عدالتی حکم نامے کی تصدیق شدہ نقل فراہم کرنے کی درخواست کی ہے۔

ذرائع کے مطابق، جیسے ہی عدالتی حکم نامے کی تصدیق شدہ کاپی موصول ہوگی، جیل حکام کے خلاف توہینِ عدالت کی درخواست دائر کرنے پر غور کیا جائے گا۔