سپریم کورٹ نے افغان شہری کو شہریت دینے کا ہائی کورٹ فیصلہ معطل کر دیا

سپریم کورٹ نے افغان شہری کو پاکستانی خاتون سے شادی کی بنیاد پر شہریت دینے کے پشاور ہائی کورٹ کے فیصلے کو معطل کر دیا۔

تفصیلات کے مطابق مرد افغان شہری کو پاکستان اوریجن کارڈ (POC) جاری کرنے سے متعلق معاملے کی سماعت جسٹس شاہد وحید کی سربراہی میں تین رکنی بینچ نے کی۔ سماعت کے دوران ایڈیشنل اٹارنی جنرل رانا اسد اللہ نے عدالت کو بتایا کہ وفاق نے یکم دسمبر 2023 کے پشاور ہائی کورٹ کے فیصلے کے خلاف اپیل دائر کر رکھی ہے۔ ہائی کورٹ نے فیصلہ دیا تھا کہ اگر کوئی مرد افغان شہری پاکستانی خاتون سے شادی کرے تو اسے POC اور شہریت دی جا سکتی ہے، تاہم حکومت اس فیصلے کے اس حصے پر اعتراض رکھتی ہے۔

جسٹس مسرت ہلالی نے استفسار کیا کہ شہریت کس بنیاد پر دی جا سکتی ہے اور اب تک کتنے درخواست گزار سامنے آئے ہیں۔ ایڈیشنل اٹارنی جنرل نے بتایا کہ 117 درخواست گزار موجود ہیں، جس پر جسٹس مسرت ہلالی نے کہا کہ یہ تو وہ ہیں جو سامنے آئے ہیں۔ نادرا کے وکیل نے بتایا کہ افغان شہری کے لیے ویلڈ ویزا کی شرط بھی ہے۔

سپریم کورٹ نے فریقین کو نوٹس جاری کرتے ہوئے پشاور ہائی کورٹ کا فیصلہ معطل کر دیا اور کیس کی مزید سماعت ملتوی کر دی۔