آئمہ کرام کو  ماہانہ وظیفہ، 10ہزار روپے آپ کے منہ پر مارتا ہوں ،مولانا فضل الرحمٰن

چناب نگر :جمعیت علمائے اسلام (ف) کے سربراہ مولانا فضل الرحمن نے مریم نواز کی جانب سے آئمہ کرام کو  ماہانہ وظیفہ دینے کے فیصلے کو سختی سے مسترد کر دیا۔

ختم نبوت کانفرنس سے خطاب کرتے ہوئے مولانا فضل الرحمٰن نے کہاکہ  "ہمیں توقع تھی کہ شاید پی ڈی ایم کے تجربے کے بعد مسلم لیگ (ن) کچھ سمجھداری دکھائے گی، مگر آج وہ ہماری مساجد کے آئمہ کو صرف دس ہزار روپے دے کر خریدنے کی کوشش کر رہی ہے۔”

مولانا نے مزید کہا کہ "محترمہ! یہ تجربہ خیبرپختونخوا میں پہلے بھی ناکام ہو چکا ہے۔ میں اسٹیج سے اعلان کرتا ہوں کہ میں یہ دس ہزار روپے آپ کے منہ پر مارتا ہوں ،  کیونکہ ہمارے ائمہ، خطباء، اور اساتذہ کی اصل پہچان ان کی غیرت اور خودداری ہے۔”

انہوں نے کہا کہ "ہمارے مدارس، اساتذہ، مہتممین، طلبہ، مساجد اور ائمہ سب اپنی الگ شناخت رکھتے ہیں، جو کسی حکومتی امداد یا سرپرستی کی محتاج نہیں۔ ہم نے ہمیشہ اپنا دینی و تعلیمی نظام بغیر سرکاری پیسے اور مداخلت کے چلایا ہے، اور ان شاءاللہ آئندہ بھی اسی طرح چلائیں گے۔”

مولانا فضل الرحمٰن نے واضح اعلان کیا کہ دینی مدارس کے معاملات میں کسی قسم کی سیاسی یا سرکاری مداخلت کسی صورت قبول نہیں کی جائے گی۔

واضح رہے کہ گزشتہ روز مریم نواز کی علماء کرام سے ملاقات میں ائمہ کا وظیفہ 25 ہزار روپے کرنے پر اتفاق کیا گیا تھا۔